Home / details /

RRA yashimiye abasora bo mu ntara y’iburengerazuba

Tariki ya 10 Ukwakira 2020 kuri Lake Kivu Serena Hotel mu Karere ka Rubavu habereye ibirori ngarukamwaka byo gushimira abasora ku nshuro ya 18, abahize abandi bahabwa ibihembo.

Umunsi wo gushimira Abasora mu Ntara y’Iburengerazuba wabanjirijwe n’igikorwa cyo gusura abasora, Komiseri Mukuru BIZIMANA RUGANINTWALI Pascal akaba yarasuye uruganda ruzacukura gaz methane mu kiyaga cya kivu rwahaye abanyarwanda akazi ndetse rukaba rwitezweho kuzajya rutanga imisoro igera kuri Miliyari enye ku mwaka, rukazanatuma habaho igabanyuka ry’ibiciro by’amashanyarazi, iki kikaba ari kimwe mu bikorwa dukesha imisoro.

Mu mwaka w’isoresha wa 2019/2020 Intara y’Iburengerazuba yinjije Imisoro y’imbere mu gihugu igera kuri miliyari 27.98 y’amafaranga y’Urwanda ku ntego yari ifite ingana na miliyari 30.2 bihwanye n’igipimo cya 92.6%, Ni ukuvuga ko intego y’umwaka yabuzeho  miliyari 2.2 Ariko hakaba harabayeho inyongera ya 3.7%; bihwanye na milliyari 1 y’amafaranga y’Urwanda ugereranyije n’umwaka wawubanjirije wa 2018/2019

Ku misoro n’amahoro ikigo cy’imisoro n’amahoro gikusanyiriza Uturere, Intara y’Iburengerazuba yakusanyirijwe miliyari 9.24 Frw ku ntego yanganaga na miliyari 10.67 Frw, ikaba yaragezweho ku gipimo cya 86.6%  ugereranyije n’umwaka wa 2018/2019.  Habayeho inyongera ya 2.7% ihwanye na miliyoni 240 z’amafaranga y’urwanda.

Nyuma yo kugaragariza Abaturage b’Intara y’iburengerazuba ibyavuye mu misoro yakiriwe mu mwaka ushize, Komiseri Mukuru hamwe n’Umuyobozi w’Intara y'Amajyaruguru MUNYANTWALI Alphose ari na we wari umushyitsi mukuru muri ibi birori bashimiye Abasora bakurikira bahize abandi mu gusora neza kandi ku gihe banashyikirizwa ibihembo:

MUSHINZIMANA WORKING FOR FASTER DEVELOPMENT COMPANY –Akarere ka Rusizi

NGORORERO MINING COMMPANY –Akarere ka Ngororero

MORIAH HILL RESORT LTD – Akarere ka Karongi

BOULANGERIE ET ALIMENTATION DE GISENYI –Akarere ka Rubavu

IBIGABIRO FOREST MOTEL –Akarere ka Nyamasheke

SAMUEL MUKESHIMANA – Akarere ka Nyamasheke na

K.C UBUMWE COMPANY – Akarere ka Rutsiro

Abasora basabwe gukomeza guhuza ingufu mu bukangurambaga ku ruhare rw’imisoro mu iterambere ry’igihugu, Kongera ubufatanye mu kubaka umuco mwiza wo kwaka no gutanga inyemezabuguzi ya EBM, Kongera ubufatanye mu kurwanya magendu n’inyerezwa ry’imisoro iryo ari ryo ryose, Kongera ubufatanye mu gukangurira abo bireba bose kwandikisha imitungo itimukanwa, no kwishyura neza imisoro n’amahoro by’Uturere.

Insangamatsiko y’uyu mwaka igira iti “Dushyigikire Ubucuruzi twubake Ubukungu nuhamye”.

Copyrights © 2022 All Rights Reserved by Rwanda Revenue Authority.

Thanks for your Feedback!

If you feedback requires a response, we'll be in touch shortly