Home / details /

RRAVC yanyagiye Ruhango VC amaseti 3-0

Ikipe ya RRA VC, ifite igikombe cya shampiyona ya 2017, yatsinze amaseti 3-0 ikipe ya Ruhango VC muri shampiyona ya Volleyball y’abari n’abategarugori igeze ku munsi wayo wa kabiri. Ni umukino wabereye mu Karere ka Rwamagana kuri iki Cyumweru tariki 25 Gashyantare, ku ishuri rya St Aloys. Iseti ya mbere yarangiye RRA VC ifite 25 kuri 21 ya Ruhango VC. Ku iseti ya kabiri RRAVC yatsinze Ruhango VC ku manota 25 kuri 12 naho iseti ya gatatu irangira ikipe ya Ruhango VC ifite amanota 10 gusa. Na none aho i Rwamagana Ruhango yabashije kuhatsindira St Aloys, yari yakiriye iyo mikino, seti 3-0. Mu marushanwa aheruka yo kwibuka uwahoze ari umuyobozi w’Urwunge rw’Amashuri rw’Indatwa n’Inkesha (GSOB), Padiri Kayumba Emmanuel, ikipe ya Ruhango yihagazeho yimisha RRAVC itike yo ku mukino wa nyuma iyitsinze amaseti 3-2. Nyuma y’insinzi ya RRA i Rwamagana, Masumbuko Jean de Dieu, Umutoza wa RRAVC yatangaje ko ashimishijwe cyane n’iyo nsinzi avuga ko ibongereye icyizere cyo kwitwara neza mu marushanwa ari imbere. Yagize ati: “Gutsinda iyi kipe tuyitsindiye no ku bitego biri hejuru cyane bitugarura mu murongo mwiza w’intsinzi.” Na none mu rwego rw’Abagore, iyindi mikino yabereye i Kigali kuri Petit Stade, ku Cyumweru, aho APR yatsinze KVC seti 3-0, irongera itsinda IPRC Kigali seti 3-0 naho KVC yatsinze IPRC Kigali set 3-1. Nyuma y’umunsi wa kabiri wa shampiyona 2018, ku rutonde rw’agateganyo, APR VC iri ku mwanya wa mbere n’amanota 11, ikurikiwe na Ruhango n’amanota 9 hakaza RRA ifite amanota 6. Umwanya wa kane uriho IPRC Kigali n’amanota 3 uwa gatanu uriho St Aloys n’inota 1 naho St Joseph na KVC ziza inyuma zikaba nta nota na rimwe zirabona.  Ikipe ya RRA VC iritegura guhagararira u Rwanda mu irushanwa nyafurika ry’amakipe yabaye aya mbere iwayo, rizaba mu cyumweru gitaha, aho izerekeza mu Misiri kuri uyu wa Gatandatu tariki 3 Werurwe 2018. Umutoza Masumbuko avuga ko ikipe yiteguye neza, akaba yizeza abanyarwanda kuzitwara neza muri iryo rushanwa.

Copyrights © 2022 All Rights Reserved by Rwanda Revenue Authority.

Thanks for your Feedback!

If you feedback requires a response, we'll be in touch shortly

Was this post helpful?