Ikipe ya Rwanda Revenue Authority itahanye umwanya wa gatanu ku rutonde rusange mu marushanwa yaberaga i Cairo ahuza amakipe yabaye aya mbere iwayo ku mugabane w’Afurika, muri Volleyball y’abagore. Aya marushanwa yitabiriwe n’amakipe 19, RRA ikaba yegukanye uwo mwanya nyuma yo gutsinda Bafia yo muri Cameroun seti 3-0 ( 25-21, 25-19, 25-14). Umutoza wungirije wa RRAVC, Masumbuko Jean de Dieu, avuga ko ikipe idatahanye umwanya mubi nubwo yari yaje ishaka kugera imbere hashoboka, yishimira ko nubwo ikipe yagarukiye muri ¼ yashoboye gutsinda andi makipe abiri akomeye. Uyu mwanya iwubonye nyuma y’aho yari yanabashije  gutsinda ikipe ya Shams yo mu Misiri seti 3-0 mu mikino yo gushaka umwanya wa 5-8 yakinwaga n’amakipe yari yageze muri ¼ ariko ntabashe gukomeza mu cyiciro gikurikiyeho, dore ko RRA yari yakuwemo na Prisons yo muri Kenya. Muri rusange, iyi kipe rukumbi yari yaserukiye u Rwanda muri aya marushanwa yakinnye imikino 6 ibasha gutsindamo ine. Umwanya wa gatanu iwutahanye nyuma y’aho muri 2016 yari yageze muri ½ igatahana umwanya wa kane, mu marushanwa yari yabereye i Tunis. Imikino yatangiye tariki 6 Werurwe ikaba yashojwe igikombe cyegukanywe na Al Ahly nyuma yo gutsinda amaseti 3-0 ikipe ya Cartage yo muri Tunisia. Amakipe yo muri Kenya abiri ariyo Pipeline na Prisons yari yavuyemo muri ½ , Pipeline ikaba yatsinze mukebawayo amaseti 3-2 ihita iba iya gatatu ku rutonde.