Kigali kuwa 12 Nyakanga 2019- Ikigo cy'Imisoro n’Amahoro kiratangaza ko cyesheje umuhigo ku kigero cya 102.1% ku ntego cyari cyahawe yo kwakira imisoro n'amahoro yakusanijwe mu mwaka w’ingengo y’imari ya 2018/2019 warangiye kuwa 30 Kamena 2019. Ibi ni ibyatangajwe na Komiseri Mukuru wa RRA, ubwo yagiranaga ikiganiro n'abanyamakuru ku Cyicaro cy'Ikigo ku Kimihurura. Amafaranga yakusanyijwe angana na miliyari 1421.7 Frw ugereranije mu gihe intego yari miliyari 1392.1 frw. Iyi ntego yagezweho ku kugero cya 102.1% ni ukuvuga ko harenzeho miliyari 29.6 Frw ku yari ateganijwe. Amafaranga aturuka ku misoro yakusanyijwe hagati ya Kamena na Nyakanga 2018/2019 yari miliyari 1398.8 Frw mu gihe intego yari miliyari 1373.1 Frw, Iyi ntego yagezweho ku gipimo cya 101.0% hakaba harabayeho kurenza intego ho miliyari 25.7 Frw. Ugereranije na miliyari 1234.1 Frw yari yakusanijwe mu mwaka w’ingengo y’imari 2016/2017, hiyongereyeho  miliyari 164.7, iri zamuka riri ku kigero cya 13.3%. Ku mafaranga atari imisoro, hakusanyijwe miliyari 22.9 Frw mu gihe intego yari miliyari 19.0 Frw. Iyo ntego yagezweho ku gipimo cya 120.2%. Ugereranije n'ayakusanijwe mu mwaka wa 2016/2017 habayeho kwiyongera ku gipimo cya 26.0%. Ku misoro n'Amahoro byeguriwe inzego z'ibanze hakusanyijwe miliyari 60.5 Frw. Mu gihe intego yari miliyari 60.1, iyi ntego yagezweho ku gipimo cya 100.6%. Harenzeho miliyari 0.4 Frw. Ibi birerekana ko hariho izamuka rya buri mwaka ringana na 12.5% bingana na miliyari 6.7 Frw. Komiseri Mukuru w’Ikigo cy’Imisoro n’Amahoro Bizimana Ruganintwali Pascal avuga ko uyu musaruro uturuka ku mpamvu zitandukanye zirimo ukwiyongera k'ubukungu ndetse no kwiyongera kw'abasora banoza inshingano zabo basora neza. Yagize ati: “Ubukungu bwari buteganijwe kwiyongera ku gipimo cya 7.5% mu mwaka w’ingengo y’imari 2018/2019, none imibare itangwa n’Ikigo cy’Igihugu cy’Ibarurishamibare mu Rwanda   yerekana ko umwaka ku wundi izamuka ry'ubukungu riri ku gipimo cya 7.7% , 9.6% na 8.4% mu gihembwe cya mbere ( Nyakanga -Nzeri), mu gihembwe cya kabiri (Ukwakira-Ukuboza) ndetse n’icya gatatu (Mutarama-Werurwe) mu mwaka wa 2018/2019” Yongeraho ko kugabanya gutakaza agaciro k’ifaranga, ubwiyongere n'ubwitabire bw’abasora, ingamba zo gushishikariza abasora gutanga umusoro biri mu by'ingenzi byatumye intego igerwaho. Muri uyu mwaka w'ingengo y'imari wa 2019/2020, Ikigo cy'Imisoro n'Amahoro gifite intego yo kwinjiza  imisoro n'amahoro bingana na miliyari 1,535.8 Frw angana na 54.1% by'ingengo y’imari y’igihugu ingana na miliyari 2,876.9 Frw. Ubuyobozi bw'ikigo bufite ingamba zizatuma iyo ntego igerwaho. Komiseri Mukuru agira ati: “ Uyu mwaka 2019/2020 tuzashyira ingufu mu gice cy’Ikoranabuhanga n’Itumanaho, Amahoteri, Utubari na restaurant, abatumiza ibintu mu mahanga ndetse n'ababunganira muri Gasutamo kugira ngo imyumvire izamuke bubahiriza amategeko agenga imisoro”