Abakora ubucuruzi bujyanye na Hotel, Restaurants ndetse na  Supermarkets bihaye ingamba z'amezi 3 ko bazaba bahinduye imikorere bakoresha neza imashini ya EBM itanga inyemezabuguzi mu buryo bw'ikoranabuhanga. Ibi babigaragaje nyuma y'ikiganiro nyunguranabitekerezo bagiranye na RRA, kuri uyu wa Kabiri, cyabereye i Kigali kuri Lemigo Hotel. Mu kiganiro ku mikoreshereze ya EBM cyatanzwe na Mbera Emmy, umuhuzabikorwa bya EBM muri RRA, yerekanye uko buri mucuruzi yagiye agaragaraho kudohoka mu gutanga inyemezabuguzi kuri buri muguzi kandi amakuru akaba agaragara muri system za RRA. Ati: Tumaze kubona mu ikoranabuhanga ko hari abacuruzi batagitanga inyemezabuguzi, twafashe gahunda y'ibyumweru bine twohereza abakozi ahakorerwa ibikorwa bibyara inyungu. Icyo gihe inyemezabuguzi zaratanzwe. Bamwe mu bacuruzi bitabiriye ibiganiro bemeye ko ibikorwa byo kudatanga inyemezabuguzi ari ibintu biteye isoni ko bikwiye guhinduka umucuruzi akajya atanga inyemezabuguzi kuri buri muguzi. Umuhuzabikorwa bya EBM yasobanuriye abitabiriye ikiganiro ko Ikoranabuhanga mu gutanga inyemezabuguzi ryashyiriweho abacuruzi kugirango bubake ubushobozi bwabo, ndetse bifashe umuguzi gutanga umusanzu we mu kubaka igihugu.                                                                                                    Abakora mu cyiciro cya za Hotel, Restaurant ndetse na Supermarket bitabiriye ibiganiro kuri EBM by'uyu munsi bavuze ko bagiye kwikubita agashyi ku ikoreshwa neza rya EBM ndetse basaba ko ibiganiro nk'ibi byazongera kuba nyuma y'amezi 3 bakazahura muri Mutarama 2021 harebwa intambwe yatewe mu gukoresha neza EBM. EBM Imaze imyaka 7 ikoreshwa. Ni uburyo bwashyizweho bufasha gutanga facture hadakoreshejwe intoki ahubwo hakifashishwa imashini mu buryo bw'ikoranabuhanga. Kuva iri koranabuhanga ryashyirwaho abarikoresha bamaze kugera ku bihumbi bisaga 25.