Ku Cyumweru tariki ya 22 Nyakanga 2018 nibwo amakipe yabaye indashyikirwa muri Shampiyona y’umupira w’intoki Volley Ball mu mwaka wa 2018 yashyikirijwe ku mugaragaro ibikombe ndetse n’andi mashimwe. RRA VC mu bagore niyo yanikiye izindi bahanganaga muri Shampiyona uyu mwaka. Yegukanye igikombe cya shampiyona ku nshuro yayo ya 6 yikurikiranya. Yahawe igikombe ndetse na sheki ya miliyoni y’amafaranga. Ni nako byagenze kuri Gisagara yanikiye andi makipe mu bagabo nayo ihabwa igikombe na sheki ya miliyoni imwe. Ibi bihembo byatanzwe nyuma y’irushanwa risoza umwaka w’imikino muri Volleyball, Carre d’As 2018, rihuza amakipe ane ya mbere muri shampiyona ryakinwe muri weekend ya 21-22 Nyakanga 2018, i Kigali kuri Petit Stade.   Carre d’As 2018 yatwawe na Gisagara VC mu bagabo ihembwa Frw 350,000 ndetse na APR mu bagore nayo yahembwe Frw 350,000. Mu bagabo, ikipe ya Gisagara VC yegukanye igikombe itsinze REG amaseti amaseti 3-2. Naho mu bagore, ikipe ya APR VC yigaranzuye RRA VC ku mukino wa nyuma n’amaseti 3-2. Mu bindi bihembo bya shampiona ya 2018 byatanzwe harimo amakipe yabaye aya kabiri: APR VC mu bagore ndetse na REG mu bagabo zahawe sheki ya Frw 600,000  naho iza gatatu arizo KVC mu bagore na UTB mu bagabo zihabwa Frw 400,000. Muri rusange Carre d’As 2018 mu bagore yari yitabiriwe na RRA, APR (W), KVC ndetse na Ruhango naho mu bagabo harimo Gisagara, REG, UTB na APR (M).